творы:ніна-мацяш:ніна-мацяш-пяць-галасоў
Ніна Мацяш — Пяць галасоў
– Каб збавіцца мне ад душэўных ран,
Забыць мне трэба пра Афганістан,
Пра славу і няславу ў той вайне,
Пра маладосць у цынкавай труне.
– Каб збавіцца мне ад душэўных ран,
Забыць мне трэба пра чарнабылян,
Кім сталі ўсе мы на зямлі айчыннай,
I выміраем ад жуды злачыннай.
– Каб збавіцца мне ад душэўных ран,
Забыць мне трэба пра ганебны зман,
Якім людзей аблутваць не зракліся
Халопы нават і пасля Тбілісі.
– Каб збавіцца мне ад душэўных ран,
Насыпаць трэба волатны курган
На ўсё, што знаем пра сябе сягоння,
Пра нашы Курапаты і Пагоню.
– На волатны курган сядаў груган.
Хто ўмёр – маўчаў,
Жывы – нямеў ад ран.
А гнеў патрабаваў крыві за кроў.
Крый Бог нам абяспамяцець ізноў!
1989
Падобныя старонкі
творы/ніна-мацяш/ніна-мацяш-пяць-галасоў.txt · Апошнія змены: 2025/08/23 15:43 — vedybeadmin