Ці бачыў ты хоць раз Белаазёрск,
Калі на дахі мякка ноч прысядзе,
Павее казкай ад старых азёр
I пойдуць песні поруч па абсадзе?

Тады глядзіш на родны, любы кут
I цэлы свет гатоў у сведкі клікаць:
Ці столькі зор насыпалася тут
На дол з каўша Мядзведзіцы Вялікай,
Ці гэта ў небе, бы ў люстэрку тым,
Адбітак зыркі ўсіх агнёў Палесся?..

Белаазёрск мой, сон мой залаты,
Мая

яшчэ не складзеная

песня!

1962

Крыніца: Ніна Мацяш. Душою з небам гаварыць: Выбраная лірыка. – Мн.: Маст. літ., 1999. – 462 с. – (Беларуская паэзія XX стагоддзя).

• Ніна Мацяш — Бязладная размова
• Ніна Мацяш — Незалежнасць
• Творчасць Ніны Мацяш
• Ніна мацяш — Дажджынка
• Ніна Мацяш — Запозненаю дзікаю ажынай...