Вы без мяне ляціце, самалёты.
Вы без мяне імчыце, цягнікі.
…Любоў мая, ты песня, і маркота,
І спелы бор, і вольны гон ракі.

Балючы век. Надвор’я перамена:
Яшчэ лісток не ўпаў – а снегапад.
Ды скрыпачка з дзесятага калена
Пяе ў душы на блаславёны лад.

Усё вастрэй – радні маёй прагалы,
Агеньчык дрогкі з маміных акон.
Ды зазвіняць вясельныя цымбалы
І жаркім вокам гляне у сэрца конь.

Пяе віхор, пяе лісток апалы,
Пяе зямля курганняў і удоў.
Любоў мая, ты скрыпка і цымбалы,
І шаргункі – над грывамі гадоў.

• Яўгенія Янішчыц — Каліна зімы
• Творчасць Яўгеніі Янішчыц
• Яўгенія Янішчыц — Свята пірага
• Яўгенія Янішчыц — Ты пакліч мяне. Пазаві...
• Яўгенія Янішчыц — Мова