Станіслаў Шушкевіч — Усё зіма заснежыла

Белымі сняжынкамі
ўся дарожка ўсеяна.
Была ў полі рэчанька,
ды не стала. Дзе яна?

Была ў полі елачка,
пышная, зялёная,
а яе мяцеліца
замяла шалёная.

Азярцо празрыстае
за сялом свяцілася,
посцілка бялюткая
на яго звалілася.

Усё зіма заснежыла:
брамы і штыкеты,
кожны куст і дрэвы
ў белае адзеты.

Ранкам нашу сцежку,
што да школы сцелецца,
мы ізноў пратопчам.
Не мяці, мяцеліца!..