Паляцелі гусанькі

па цяпло,

Туды, куды лецейка

ўцякло.

Як ляцелі нізенька

над зямлёй,

Жаласліва крыкнулі

ўсёй сям’ёй.

Рэкі і імшарышчы,

сенажаць

Шкода шэрым гусанькам

пакідаць.

Ды нядоўга ўдалечы

ім бываць,

Ды нядоўга гусанькам

гараваць.

Зноў пачуем зводдалі

шумны крык,

Калі прыйдзе радасны

красавік.

Прынясуць нам з выраю

зноў цяпло,

Што ў пару асеннюю

ўцякло.

• Станіслаў Шушкевіч — Камарык
• Станіслаў Шушкевіч — Свавольнікі
• Станіслаў Шушкевіч — Верабейка
• Станіслаў Шушкевіч — Знатныя лісічкі
• Станіслаў Шушкевіч — Па лісточку поўзаў смоўж