Маркотна мне вясну страчаць у мяккім ложку.
Хваробы – што рабіць! – бяруць сваё

патрошку,

Пільнуюць з-за вугла: не разыходзься дужа,
Пара на тармазы больш націскаць, мой дружа!
Марней, хадзі цішком у медыцынскіх лейцах,
Абы не хваляваць і не натужыць сэрца.
Астудзіш так яго, і ўжо не сэрца будзе,
А торбачка крыві, што ні сабе ні людзям…

Хутчэй устань, ідзі, у твар глядзі пагрозе,
Парвіся, сэрца, лепш ты з песняю ў дарозе.

1971

Крыніца: Лужанін М. Збор твораў. У 4-х т. Т. 3. Падарожныя нізкі; Вершы 1966-1973; Як нараджаўся новы свет; Рэпартаж з рубцом на сэрцы. – Мінск: Мастацкая літаратура, 1981. – 512 с.

• Максім Лужанін — Добры хлопец Дзік
• Максім Лужанін — Беларускаму народу
• Максім Лужанін — Смутная радасць
• Максім Лужанін — Чарнобыльскі вецер
• Максім Лужанін — Снег – трэці дзень...