Дзяжурны пакой машыністаў –
Агенцтва дарожных навін –
Аглушаны рыпам і свістам
Засмяглых ад рэйсаў машын.
Хаця скразнякі магістралі
Працялі яго да касцей,
Ён пільна ўглядаецца ў далі,
Ён новых чакае гасцей.
Пра ўсё, што людзьмі перажыта,
Разменам тут доўга палаць.
I будуць навіны
транзітам
Да станцый далёкіх спяшаць.
Дзяжурка ж – ураз анямее,
Хоць ты ў адзіноце крычы.
I доўга яе чырванеюць
Бяссонныя вочы ўначы…
1961
Крыніца: Грачанікаў А. Верасень: Вершы. – Мн.: Маст. літ., 1984. – 142 с.