У школьным клубе ёлка
Прыгожая стаіць:
Красою пышнай вабіць,
Уся аж зіхаціць.

Высока на галінцы
Вавёрачка сядзіць,
Трымае ў лапках шышку,
Што золатам блішчыць.

Спыніўся каля ёлкі
Калматы звер-мядзведзь,
Нібы на сонцы хоча
Сваю спіну пагрэць.

Вунь заяц палахлівы
Пад ёлачку бяжыць,
А хітрая лісіца
Услед яму глядзіць.

Прыгожыя тут птушкі
I рыбкі мільгацяць,
I грушы, і цукеркі,
I яблыкі вісяць.

З галінак парашуты
Спускаюцца на дол,
А вунь і самалёты
Ўзляцелі аж пад столь.

Развесістая ёлка
Красою зіхаціць,
А ў самым версе зорка
Чырвоная гарыць.

• Янка Журба — Вясна ідзе
• Янка Журба — Залацісты вечар дагарае...
• Янка Журба — Братняй Украіне
• Янка Журба — Коцік
• Жыццёвы і творчы шлях Янкі Журбы