творы:янка-журба:янка-журба-вавёрка
Янка Журба — Вавёрка
Я рухавы звярок,
Заўжды весела мне.
Мая хатка – дупло
На высокай сасне.
Я на дубе нарву
Шмат буйных жалудоў
I к зімовай пары
Прынясу іх дамоў.
На галінках сасны
Я грыбоў насушу,
Іх багата к зіме
У свой дом нанашу.
Я рухавы звярок,
Шмат арэхаў знайду,
Самых лепшых нарву
I ў дупло накладу.
Не баюся зімой
Я марозаў ліхіх:
Спачываю ў дупле
На лісточках сухіх.
А як сонца зірне,
Я скачу па сасне.
Цёпла ў шубе маёй
I суровай зімой.
1940
Падобныя старонкі
творы/янка-журба/янка-журба-вавёрка.txt · Апошнія змены: 2025/08/23 15:45 — vedybeadmin