Ля гэтых сосен нельга не спяваць.
Нібы ахопленыя полымем пажару,
Яны, чырванастволыя, шумяць,

Калышучы вяршаліны, як хмары.
Гуллівыя, густыя, ад якіх
Не знае цішыні – спакою Нарач.

Ля гэтых сосен цяглых, векавых
Не ўспомніць нельга грозных дзён мінулых
I партызанскіх вогнішчаў і тых,
Чые курганы слава ахінула.
Яшчэ і сёння з кожнага ствала
Смала слязіцца, дзе ўпілася куля.

Ля гэтых сосен маладосць прайшла,
I я ў дні вераснёвыя свабоду
Сустрэў тут, ля рыбацкага сяла.

Таму мне дорагі яны заўсёды,
I ў сэрцы. Знаю, іх вясенні шум
Ніякая не згасіць непагода.

Ля гэтых сосен я табе пішу,
Яны шумяць пад сонечным блакітам.
Калі не мне, дык ім, цябе прашу,
Як некалі, хоць песняй адкажы ты!..

1952

• Алесь Салавей — О не, ня цёмным воблакам шпакі...
• Тэрцына
• Алесь Салавей — Восеньскія тэрцыны
• Алесь Салавей — Мала
• Янка Сіпакоў — Тэрцыны пра наручнікі