Ліхтарняў свет у сіняй вышыне…
Вітрынамі зіяючыя крамы,
Кавярні, мора вывесак, як плямы,
Анонсы і плакаты на сцяне.

Кіпіць натоўп на жорсткім вулак дне!
Снуюць хлапцы, суюшчыя рэкламы…
Разносчыкі крычаць ля кожнай брамы…
Грук, гоман, гул, – усё ракой імкне.

А дальш – за радам кас, ламбардаў, банкаў, –
Агні вакзала… павадка хурманкаў…
Віры людзей… сіпяшчы паравоз…

Зялёны семафор… пакгаўз… склады…
Заводаў коміны пад цьмой нябёс…
О, горада чароўные прынады!

• Максім Багдановіч — Страцім-лебедзь
• Патрыятычная лірыка Максіма Багдановіча
• Творчасць Максіма Багдановіча
• Максім Багдановіч — Вадзянік
• Уладзімір Жылка — Вершы аб Вільні