Над дарогай –

туман ці пыл.

Ля дарогі –

маўклівы сад.

I гудуць, і гудуць слупы,
Як і дзесяць гадоў назад.

I над сцежкаю палявой
Васількамі – мае гады…
Ці то зоркі над галавой,
Ці то яблынь цяжкія плады.

Вецер шастае баравы,
Глуха грушы старыя рыпяць…
Ці то ў вырай ляцяць журавы,
Ці то песні не хочуць спаць…

Зноў для кожнай травінкі свой
Я на мілай бацькоўскай зямлі.
Толькі маці стала сівой…
Толькі яблыні адцвілі…

1965

• Біяграфія Генадзя Бураўкіна
• Генадзь Бураўкін — Шпак спявае
• Генадзь Бураўкін — Малітва
• Генадзь Бураўкін — Калыханка
• Генадзь Бураўкін — Я хачу прайсці па зямлі...