творы:янка-купала:янка-купала-а-хто-там-ідзе
Янка Купала — А хто там ідзе?
А хто там ідзе, а хто там ідзе
У агромністай такой грамадзе?
– Беларусы.
А што яны нясуць на худых плячах,
На руках ў крыві, на нагах у лапцях?
– Сваю крыўду.
А куды ж нясуць гэту крыўду ўсю,
А куды ж нясуць на паказ сваю?
– На свет цэлы.
А хто гэта іх, не адзін мільён,
Крыўду несць наўчыў, разбудзіў іх сон?
– Бяда, гора.
А чаго ж, чаго захацелась ім,
Пагарджаным век, ім, сляпым, глухім?
– Людзьмі звацца.
Падобныя старонкі
творы/янка-купала/янка-купала-а-хто-там-ідзе.txt · Апошнія змены: 2025/08/23 15:45 — vedybeadmin