Маці адвячоркам
Села ля акна:
Хоча дзецям казку
Расказаць яна.

Каля роднай мамкі
Селі мы ў радок.
Нам прытульна, добра,
Цёплы наш куток.

Завіруха вые
Ў цемрадзі пустой.
Палілася казка
Хваляй залатой.

Пра таго асілка,
Што павёў народ,
Каб прагнаць з краіны
Ўвесь варожы род.

Слухаем уважна
Мы матульчын сказ.
Шпарка пралятае
Наш вячэрні час.

Роем нашы думкі
Хуценька плывуць
Ўдаль, за акіяны,
Ў небяспечны пуць.

Хай завеі ў полі,
Хай і сівер там, –
Тут, у цёплай хаце,
Добра з маткай нам.

1921

• Янка Золак — Ода маці
• сустрэча-з-маці
• на-скрыжаванні
• i-надыходзіць-дзень
• да-маці