І верасень яшчэ зялёны,
Трава замглёная ледзь-ледзь,
Павольна сонечныя клёны
Чаканяць золата і медзь.

Замоўкла ўсё, як таямніца,
І патанула ў цішыню,
Гарчанкай позняй дыміцца
Іскрынка дальняга агню.

У голым полі – анікога,
Буяе верасовы цвет,
І пасівелая дарога
Вядзе кудысьці ў белы свет.

Стаю адзін на раздарожжы,
Праводжу жураўліны клін,
І зачароўвае прыгожы
Куст кармазынавых калін.

За лістам ліст ляціць на плечы,
Запахла водарам раллі…
Вясну і новыя сустрэчы
І мне прарочаць жураўлі.

2002

• Сяргей Грахоўскі — Стары млын
• Біяграфія Сяргея Грахоўскага
• Сяргей Грахоўскі — Мама
• Сяргей Грахоўскі — Прызнанне
• Сяргей Грахоўскі — Чалавеку патрэбна не слава...