Ірынцы спадабалася
Цудоўная вясна.
Як восені даждалася,
Пайшла прасіць яна,

Прасіць нябёс не хмарыцца,
Вятроў – не галасіць,
Срабрыстых росаў раніцай
На травах не гасіць;

Каб сонейка высокае
Свяціла на палі,
А кветкі сінявокія
Зноў на лугох цвілі;

Прасіць сям’ю крылатую
З лясоў не адлятаць,
Бярозку расахатую
Лістоў не атрасаць…

Прасіла яна шчыра так,
Прасіла ўсю зіму,
І мо’ вясна аж з выраю
Вярнулася таму.

Вярнулася, пяе ізноў
З бярозкай над ракой,
Пяе сярод дуброў, лугоў
З Ірынкаю малой.

• максім-танк/давераснёўская-творчасць-максіма-танка
• максім-танк/ідэйны-змест-паэмы-максіма-танка-люцыян
• максім-танк
• максім-танк/жыццё-і-творчасць-максіма-танка
• максім-танк/матывы-і-вобразы-паэзіі-максіма-танка