Каб дайсці да казкі,
Трэба развітацца
З дарогамі езджанымі,
Дарожкамі ходжанымі,
Дарожанькамі грыбнымі
I ягаднымі…
А даверыцца – сцежкам
Ласіным і заечым,
Мураўіным і яшчаркавым,
Слімаковым і вожыкавым…
I даверыцца –
Карчам асінавым,
Святаянскім агеньчыкам,
Вачам савіным,
Слязам жывіцы,
Што ў змроку цепляцца…
I даверыцца –
Травам непрымятым,
Галасам непуджаным,
Шорахам неразгаданым…
I даверыцца –
Зелені найзелянейшай,
Цемені найцямнейшай,
Цішыні найцішэйшай,
У якой нават сэрца стук
Громам здаецца.

1965

• Давераснёўская творчасць Максіма Танка
• Максім Танк — Люцыян Таполя. Ідэйны змест
• Жыццё і творчасць Максіма Танка
• Матывы і вобразы паэзіі Максіма Танка
• Біяграфія Максіма Танка