Гэта старая версія дакумента!

Алесь Звонак — Курапаты

Капай глыбей, капай смялей, лапата,
Дакопвай жудасць праўды да канца!
Што можа быць страшней за Курапаты,
Страшней, чым кроў і попел Трасцянца?!

Тут свой свайму, зямляк ці брат сабрату
Не шкадаваў смяротнага свінца.
У рукі ўклаў ім «геній» канапаты
Сякеру ката, а не штых байца!

Мінуўшчыны нямазанае кола,
На павароце часу не рыпі!
Не дай наш боль чыноўнае назоле
У папяровым моры утапіць.

Галовы моўчкі пасхіляйма долу,—
На нас глядзяць з дакорам чарапы!

1991

Падобныя старонкі

сяргей-грахоўскі/сяргей-грахоўскі-ахвяры
сяргей-грахоўскі/сяргей-грахоўскі-вечная-памяць
максім-танк/максім-танк-курапаты
васіль-быкаў/васіль-быкаў-жоўты-пясочак
генадзь-бураўкін/генадзь-бураўкін-курапаты