~~META:
title = Уладзімір Бутрамееў — Славутая дачка Полацкай зямлі
&keywords = уладзімір, рагнеда, полацк, горад, сыны, рагвалод, кіеве, князем, яраполк, дачка, час, анастасія, брат
&abstract = Апавяданне Уладзіміра Бутрамеева "Славутая дачка Полацкай зямлі"
&iftrue = nan
~~

====== Уладзімір Бутрамееў — Славутая дачка Полацкай зямлі ======
//(скарочана)//

Крывічы − адно з самых шматлікіх славянскіх плямён − пабудавалі свой галоўны горад на рэчцы Палата, якая і дала гораду назву − Полацк.\\
Першым полацкім князем, пра якога захаваліся летапісныя звесткі, быў Рагвалод.\\
На той час на поўнач ад Полацка ўжо існаваў славянскі горад Ноўгарад. А на поўдзень ад Полацка на Дняпры ляжаў старажытны славянскі горад Кіеў.\\
На прастоле ў Кіеве сядзеў Яраполк, а ў Ноўгарадзе княжыў яго малодшы брат Уладзімір. Хутка паміж братамі пачалася вайна за тое, каму стаць галоўным князем. Полацк ляжаў на шляху абодвух братоў, што вось-вось павінны былі пачаць бойку. І Яраполк, і Уладзімір хацелі перацягнуць полацкага князя на свой бок і спадзяваліся на яго дапамогу.\\
У Рагвалода былі два сыны і дачка. Дачку звалі Рагнеда. Слава пра яе прыгажосць дайшла і да Ноўгарада, і да Кіева. Уладзімір паслаў у Полацк сватоў. Кіеўскі Яраполк таксама хацеў узяць яе за жонку. Рагвалод не стаў прымушаць Рагнеду і дазволіў ёй самой выбраць мужа. Гордая палачанка адмовіла паслам Уладзіміра.\\
Атрымаўшы адмову, Уладзімір наняў варагаў і пайшоў на Полацк. Штурм цягнуўся некалькі дзён − палачане што ёсць сілы баранілі родны горад. У баі загінулі адважны Рагвалод і абодва яго сыны. Ворагі ўзабраліся на сцены, падпалілі дамы. Полацк быў разбураны дашчэнту. Большая частка жыхароў загінула, а тых, хто застаўся жывы, забралі ў палон.\\
Рагнеду Уладзімір сілаю прымусіў пайсці за яго. Заступіцца за яе не было каму, і ёй давялося стаць жонкай ненавіснага забойцы сваіх родных. А Уладзімір, каб яна заўсёды помніла пра паражэнне Полацка, даў ёй другое імя − Гарыслава.\\
Пасля разгрому Полацка Уладзімір асадзіў Кіеў, забіў свайго старэйшага брата Яраполка і стаў адзін княжыць у Кіеве.\\
...Аднойчы, калі Уладзімір заснуў, Рагнеда хацела забіць яго. Уладзімір прачнуўся і адабраў нож.\\
− Бацьку майго ты забіў, зямлю маю ты захапіў, а мяне як паланянку ўзяў за жонку! − усклікнула Рагнеда.\\
Разгневаны Уладзімір загадаў апрануць ёй самае прыгожае адзенне, у якім яна хоча памерці, сесці на ложа і чакаць смерці, а сам пайшоў па меч. Рагнеда паклікала свайго старэйшага сына Ізяслава, зусім яшчэ хлопчыка. І калі Уладзімір увайшоў, каб забіць Рагнеду, сын аклікнуў яго:\\
− Бацька, ты тут не адзін!\\
Уладзімір убачыў сына, у руках якога быў аголены меч, сумеўся і не крануў Рагнеду. Ён сабраў баяраў і расказаў ім пра тое, што здарылася. Баяры параілі яму адпусціць Рагнеду з дзецьмі на радзіму − у Полацкае княства. Полацк быў разбураны, і Уладзімір загадаў пабудаваць для сваёй былой жонкі новы горад і назваў яго імем сына, які ўратаваў маці ад смерці, − Ізяслаўлем (цяпер горад Заслаўе).\\
Праз нейкі час Рагнеда таксама прыняла хрысціянства. Яна заснавала каля Ізяслаўля першы на ўсходнеславянскай зямлі манастыр і жыла ў ім, прыняўшы манаскае імя Анастасія. Праз нейкі час Рагнеда-Гарыслава-Анастасія памерла. Усе гэтыя падзеі адбыліся вельмі даўно − у дзясятым стагоддзі, амаль тысячу гадоў таму назад.\\
...Кожны народ памятае заснавальнікаў княжацкіх і царскіх дынастый1. У нас гэта Рагвалод і яго дачка Рагнеда, дзеці і ўнукі якой прадоўжылі дынастыю полацкіх князёў.

 


===== Падобныя старонкі =====
  * [[творы/алесь-разанаў/алесь-разанаў-рагнеда]]
  * [[ibdc.ped>рагвалод-і-рагнеда]]
  * [[творы/іншае/уладзімір-бутрамееў-страсці-па-аўдзею]]
  * [[ibdc.ped>рагвалод-і-рагнеда-3550]]
  * [[творы/вацлаў-ластоўскі/вацлаў-ластоўскі-князёўна-рагнеда]]