~~META:
title = Яўгенія Янішчыц — Свята пірага
&keywords = свята
&abstract = Чытаць верш Яўгеніі Янішчыц "Свята пірага"
&iftrue = nan
~~

====== Яўгенія Янішчыц — Свята пірага ======
Пірог спякла, ды ўспомніла шайморы,\\
Бяздомнасці сівыя палыны...\\
Ты плачаш, мама? (Год ідзе каторы,\\
Каторы час ідзе пасля вайны!)\\
\\
Ты ўся гарыш, нібы пасля застуды,\\
Як за акном — пякуча-алы мак.\\
Мне страшна так, што я бягу да студні,\\
Вядро ж не набіраецца ніяк!\\
\\
Нясу нарэшце менш чым паўвядзерца —\\
Вада чамусьці плешча цераз край!\\
Маёй журбы сярэбранае сэрца,\\
Ты пачакай. Я хутка. Пачакай!\\
\\
Пагодны май, і светлыні даволі.\\
Святочны май. I свята пірагоў.\\
Ды ўбачу, як расце яшчэ на полі\\
Наш горкі хлеб. I горкая любоў.

 


===== Падобныя старонкі =====
  * [[творы/яўгенія-янішчыц/творчасць-яўгеніі-янішчыц]]
  * [[творы/яўгенія-янішчыц/яўгенія-янішчыц-каліна-зімы]]
  * [[творы/яўгенія-янішчыц/яўгенія-янішчыц-мова]]
  * [[творы/яўгенія-янішчыц/яўгенія-янішчыц-ты-пакліч-мяне-пазаві]]
  * [[творы/яўгенія-янішчыц/яўгенія-янішчыц-прыедзь-у-край-мой-ціхі]]