~~META:
title = Яўгенія Янішчыц — Рубаі
&keywords = нашто
&abstract = Чытаць "Рубаі" Яўгеніи Янішчыц
&iftrue = nan
~~

====== Яўгенія Янішчыц — Рубаі ======
Садралі белую кару\\
З бярозкі юнай не ў пару.\\
Здаецца мне, што не бяроста,\\
А я у полымі гару.\\


*

Ў сябе, бы ў студню зазірні.\\
Дай адстаяцца чысціні.\\
Тады, мастак, і я з табою\\
Тваёй паверу вышыні.\\


*

Спявала песню мне Гульсхор\\
Пра сіняву і веліч гор.\\
Ды мне чамусьці ўспамінаўся\\
Мой ціхі гай, мой цёмны бор.\\


*

На шчасце даў мне Файзуло\\
Залётнай ластаўкі крыло.\\
Ці не яно часцей вяртае\\
Мяне у роднае сяло?\\


*

Зялёны край. Знаёмы кут.\\
Мне б назаўжды застацца тут,\\
Каб не было на свеце іншых\\
Дарог, шуканняў і пакут.\\


*

Хітрэц, нашто мне твой бутон?\\
Ханжа, нашто мне твой паклон?\\
Але прыму я ад кахання\\
Усё – і ружу, і праклён.\\


*

Там –\\
У мяцельнай\\
Белай крутаверці,\\
Ці не прапаў\\
Мой голас у трысці?\\
Ці мо згубіўся ён\\
У тым канверце,\\
Што ўзяўся

белы голуб

данясці?..\\


\\
Крыніца: Янішчыц Я. Дзень вечаровы. Вершы. Мн., «Маст, літ.», 1974. – 80 с.

 


===== Падобныя старонкі =====
  * [[творы/яўгенія-янішчыц/яўгенія-янішчыц-каліна-зімы]]
  * [[творы/яўгенія-янішчыц/творчасць-яўгеніі-янішчыц]]
  * [[творы/яўгенія-янішчыц/яўгенія-янішчыц-ты-пакліч-мяне-пазаві]]
  * [[творы/яўгенія-янішчыц/яўгенія-янішчыц-мова]]
  * [[творы/яўгенія-янішчыц/яўгенія-янішчыц-свята-пірага]]