~~META:
title = Яўгенія Янішчыц — Любоў мая...
&keywords = цымбалы, лісток, любоў
&abstract = Чытаць верш Яўгеніі Янішчыц "Любоў мая"
&iftrue = nan
~~

====== Яўгенія Янішчыц — Любоў мая... ======
Вы без мяне ляціце, самалёты.\\
Вы без мяне імчыце, цягнікі.\\
...Любоў мая, ты песня, і маркота,\\
І спелы бор, і вольны гон ракі.\\
\\
Балючы век. Надвор’я перамена:\\
Яшчэ лісток не ўпаў – а снегапад.\\
Ды скрыпачка з дзесятага калена\\
Пяе ў душы на блаславёны лад.\\
\\
Усё вастрэй – радні маёй прагалы,\\
Агеньчык дрогкі з маміных акон.\\
Ды зазвіняць вясельныя цымбалы\\
І жаркім вокам гляне у сэрца конь.\\
\\
Пяе віхор, пяе лісток апалы,\\
Пяе зямля курганняў і удоў.\\
Любоў мая, ты скрыпка і цымбалы,\\
І шаргункі – над грывамі гадоў.

 


===== Падобныя старонкі =====
  * [[творы/яўгенія-янішчыц/яўгенія-янішчыц-каліна-зімы]]
  * [[творы/яўгенія-янішчыц/творчасць-яўгеніі-янішчыц]]
  * [[творы/яўгенія-янішчыц/яўгенія-янішчыц-свята-пірага]]
  * [[творы/яўгенія-янішчыц/яўгенія-янішчыц-ты-пакліч-мяне-пазаві]]
  * [[творы/яўгенія-янішчыц/яўгенія-янішчыц-мова]]