~~META:
title = Яраслаў Пархута — Як рабілі вясёлку
&keywords = праменьчык, аранжавы, зялёны, бераг, неба, чырвоны, сіні, фіялетавы, блакітны, зямлі, паясок, пераскочыў, стужка, азярыну
&abstract = Чытаць казку Яраслава Пархуты "Як рабілі вясёлку"
&iftrue = nan
~~

====== Яраслаў Пархута — Як рабілі вясёлку ======
Пры азярыне між кветак і траў гулялі ў хованкі праменьчыкі. Іх было ажно сем – Фіялетавы, Сіні, Блакітны. Зялёны, Жоўты, Аранжавы і Чырвоны. Раптам праменьчык Фіялетавы сказаў:\\
– Надакучыла тут. Хачу на другі бераг азярыны!\\
Абапёрся адным канцом на купіну, выгнуўся дугою, другі канец апусціў на процілеглы бераг і засвяціўся ад радасці.\\
Убачыў праменьчык Сіні, як брат ягоны раскашуе, і таксама сказаў:\\
– На той бераг хачу!\\
Пераскочыў азярыну, далучыўся да праменьчыка Фіялетавага, і ўжо на пару заззялі яны над зямлёю.\\
Зайздросна стала праменьчыку Блакітнаму, і ён, доўга не думаючы, кінуўся да братоў.\\
У небе цяпер тры стужачкі каляровыя гарэлі.\\
Праменьчык Зялёны не вытрымаў, шугануў увысь і адтуль гукнуў:\\
– Гэй, там, на зямлі! Да нас гайда! Тут прасторна! І відаць далёка!..\\
Праменьчык Жоўты павагаўся, а тады ўзяў і таксама пераскочыў азярыну. І атрымаўся ладны паясок – пяцікаляровы.\\
«А я хіба горшы?» – падумаў праменьчык Аранжавы і кінуўся следам.\\
У небе ўжо гарэў шасцікаляровы паясок. Бачачы такое дзіва, праменьчык Чырвоны сказаў:\\
– Браты, а мяне прымеце ў сваю кампанію?\\
– Прымем! Прымем! – пачуліся галасы. – Не марудзь толькі...\\
Праз хвіліну ў небе над азярынай павісла незвычайная стужка. У ёй былі ўсе сем колераў – чырвоны, аранжавы, жоўты, зялёны, блакітны, сіні і фіялетавы. І радавалася ім усё жывое на зямлі. А паколькі тая стужка гарэла надзвычай весела, то людзі і назвалі яе проста і ясна – Вясёлка.

 


===== Падобныя старонкі =====
  * [[творы/яраслаў-пархута/яраслаў-пархута-журавы]]
  * [[творы/яраслаў-пархута/яраслаў-пархута-бомжык]]
  * [[творы/яраслаў-пархута/яраслаў-пархута-птушыны-інтэрнат]]
  * [[творы/яраслаў-пархута/яраслаў-пархута-снегавічок]]
  * [[творы/яраслаў-пархута/яраслаў-пархута-апошні-гусляр]]