~~META:
title = Яраслаў Пархута — Хвалькі
&keywords = прыгожая, зорачка, выцінанка, крупінка, сняжынка, сказала, кляновы, лісток, сонейка
&abstract = Чытаць казку Яраслава Пархуты "Хвалькі"
&iftrue = nan
~~

====== Яраслаў Пархута — Хвалькі ======
Аднойчы на пажоўклы кляновы лісток, што прыбіўся ветрам да плота, апусціліся тры сняжынкі – Зорачка, Выцінанка і Крупінка. Паляжалі хвіліну-другую, паўзіраліся, як іхнія сяброўкі кружацца ў паветры, ды пачалі выхваляцца адна перад адной. Сняжынка Зорачка сказала:\\
– Я самая прыгожая! За гэта мяне і паважаюць. Нездарма партрэт мой па многіх краінах разышоўся.\\
Сняжынка Выцінанка абурылася:\\
– Кіназорка знайшлася! Самая прыгожая – гэта я. З мяне дзяўчаты некалі нават фасоны здымалі, калі папяровыя фіранкі рабілі.\\
Сняжынка Крупінка таксама не ўтрымалася:\\
– Я самая прыгожая! I кругленькая, і мякенькая, быццам клубочак, які кацяняты на падлозе качаць любяць.\\
Пачула тую пахвальбу Сонейка, выглянула з-за хмаркі і сказала:\\
– Як на мой розум, то ўсе вы прыгожыя. Кожная па-свойму. Так што супакойцеся, пакіньце сварыцца.\\
– Не! – запярэчылі ў адзін голас Зорачка, Выцінанка і Крупінка. – Ты зірні ўважліва! Тады ўбачыш, каторая з нас прыгажэйшая.\\
Сонейка кінула на кляновы лісток сноп прамянёў і не паспела прыгледзецца, як усе тры сняжынкі расталі. Ператварыліся ў аднолькавыя малюсенькія кропелькі. А пасля яны збегліся ў адно месца і сталі... Кропляй.\\
Кропля крутанулася, паглядзела туды, паглядзела сюды і сказала Сонейку:\\
– Самая прыгожая – гэта я, Кропля! Калі пажадаю, то магу і Сонцам зрабіцца. Яркім. Залацістым. Во якая я!..\\
Пачула Сонейка тую пахвальбу і схавалася за хмарку. Аднекуль прыляцеў вецер, шугануў уздоўж плота. Кроплі не стала – расплылася на лістку мокрай плямай.\\
Кляновы лісток, які дагэтуль маўчаў, ажно зморшчыўся:\\
– Хвалькі!

 


===== Падобныя старонкі =====
  * [[творы/яраслаў-пархута/яраслаў-пархута-апошні-гусляр]]
  * [[творы/яраслаў-пархута/яраслаў-пархута-бомжык]]
  * [[творы/яраслаў-пархута/яраслаў-пархута-снегавічок]]
  * [[творы/яраслаў-пархута/яраслаў-пархута-журавы]]
  * [[творы/яраслаў-пархута/яраслаў-пархута-птушыны-інтэрнат]]