~~META:
title = Яраслаў Пархута — Журавы
&keywords = старога, глядзі, човен
&abstract = Чытаць кароткую навелу Яраслава Пархуты "Журавы"
&iftrue = nan
~~

====== Яраслаў Пархута — Журавы ======
Іх гнала ў нялёгкую дарогу восень. I яны плылі ў сіняй бездані, пасылаючы на зямлю сваю развітальную песню. Гэта журботнае «кру-кру» падала на чараты, на прыбярэжны лазняк і памірала, прыглушанае ўсплёскамі азёрнай хвалі.\\
Мы сядзім у чаўпе і моўчкі ўзіраемся ў неба. Я ведаю, што ў старога Андрэя шчыміць на сэрцы, і бачу, як вочы яго з сумам развітваюцца яшчэ з адным летам...\\
– Глядзі! Глядзі! – раптам схамянуўся стары.\\
Я разварочваю човен і заўважаю, як з глыбокага блакіту нібы хтосьці шпурнуў важака долу. Ён рыўкамі, як вялікі тапаліны ліст, асядае на сівы, спалавелы поплаў. А над важаком, збунтаваўшыся, кружаць і так тужліва курлыкаюць яго журавы...\\
– Не даляцеў. Падарваўся, – ціха, нібы сам сабе, гаворыць Андрэй.\\
Паспакайнелая хваля ўжо не гойдае човен. I сціхла ў вушах трывожная песня птушак. Толькі ледзь чуцён шэпт старога:\\
– У жорава такое здараецца на паўдарозе. I ў чалавека...

 


===== Падобныя старонкі =====
  * [[творы/яраслаў-пархута/яраслаў-пархута-снегавічок]]
  * [[творы/яраслаў-пархута/яраслаў-пархута-апошні-гусляр]]
  * [[творы/яраслаў-пархута/яраслаў-пархута-бомжык]]
  * [[творы/яраслаў-пархута/яраслаў-пархута-камароўка]]
  * [[творы/яраслаў-пархута/яраслаў-пархута-птушыны-інтэрнат]]