~~META:
title = Яраслаў Пархута — Дразды
&keywords = дразды, пап’ю, траскацеў, чуеш, другі, вадзіцы
&abstract = Чытаць кароткую навелу Яраслава Пархуты "Дразды"
&iftrue = nan
~~

====== Яраслаў Пархута — Дразды ======
Сонца прыгравала ў плечы. Зрэдку налятаў ветрык, прабягаў па верхавінах елак, і яны пачыналі сеяць на дол крылатыя семкі. Цішынёю і спакоем жыў лес. Ды раптам паблізу нехта свіснуў. Раз. Другі. Падумалася: мо хлапчукі прыбеглі? Ажно не. Пераклікаліся дразды.\\
– Чу-еш, чу-еш, чу-еш! – гукаў адзін.\\
– Чую, чую, чую! – далятала здаля.\\
– Дзе ты, дзе ты?\\
– Вось тут, вось тут!\\
– Ляці-ляці-ляці!\\
– Па-чча... пача... пачакай! Пап’ю вадзіцы. Вадзіцы пап’ю!\\
– Папі-папі-папі! – пагаджаўся той.\\
Недзе па другі бок бору пачуўся матацыклет. Ён, відаць, забуксаваў па раскіслай лясной дарозе, бо ўсё траскацеў і траскацеў.\\
– Ці чуеш? Ці чуеш? – занепакоіўся дрозд, што быў бліжэй да мяне.\\
– Ліха з ім! – адказаў напарнік. – Ляцім!\\
I дразды паляцелі. Я цяпер чуў толькі прыглушаны адлегласцю птушыны неспакой:\\
– Ці сіта ўзяў? Нясі сітам вадзіцу. Ва-дзі-цу!.. Я прыспешыў крок. Няхай дамаўляюцца. Іхняя пара!

 


===== Падобныя старонкі =====
  * [[творы/янка-брыль/увесь-свет-адзін-дом-па-раману-янкі-брыл]]
  * [[творы/янка-брыль/птушкі-i-гнёзды-сцюдзёны-вырай-аповесць-]]
  * [[ibdc.ped>птушкі-шчасця]]
  * [[творы/янка-брыль/птушкі-i-гнёзды-гнёзды-за-дымам-аповесць]]
  * [[творы/янка-брыль/раман-янкі-брыля-птушкі-і-гнёзды-вобраз-]]