~~META:
title = Яраслаў Пархута — Ажынавы дзень
&keywords = есць, малінаўка, ажына
&abstract = Чытаць апавяданне Яраслава Пархуты "Ажынавы дзень"
&iftrue = nan
~~

====== Яраслаў Пархута — Ажынавы дзень ======
Якая тады ажына ўрадзіла! На дзіва ўсяму свету. Мы паехалі ў лес, як толькі дачуліся пра гэта. I адразу, скраечку, натрапілі на ягады. Сузор’ямі звісалі яны з гнуткіх галін, і кожная ягадзіна нагадвала гняздзечка ластаўкі.\\
Ты стаяла па той край ажынавых кустоў і ціха казала:\\
– А тут ажыну малінаўка дзяўбла...\\
Я засмяяўся:\\
– Хіба малінаўка есць ажыны? Ёй і маліны хапае!\\
– Есць, есць! – не пагадзілася ты, і рукі твае запрацавалі шпарчэй.\\
Я тады пабойваўся, каб не скалолася, не нарабіла драпін, бо ажынавыя пруты – быццам дрот калючы. Заўважыў яшчэ: ажына была такая расяная – як твае вочы. I ад ягад ішоў п’янлівы-п’янлівы пах...\\
Мы потым сядзелі пры лясной дарозе, на цёплым пляскатым камені і чакалі спадарожнай машыны.\\
I абаім хацелася, каб як найдаўжэй не было яе.

 


===== Падобныя старонкі =====
  * [[творы/яраслаў-пархута/яраслаў-пархута-журавы]]
  * [[творы/яраслаў-пархута/яраслаў-пархута-снегавічок]]
  * [[творы/яраслаў-пархута/яраслаў-пархута-птушыны-інтэрнат]]
  * [[творы/яраслаў-пархута/яраслаў-пархута-апошні-гусляр]]
  * [[творы/яраслаў-пархута/яраслаў-пархута-бомжык]]