~~META:
title = Ян Чачот — Да мілых мужычкоў
&keywords = бог, слухаць
&abstract = Верш Яна Чачота "Да мілых мужычкоў"
&iftrue = nan
~~

====== Ян Чачот — Да мілых мужычкоў ======
Ды і я вам памагу

Песеньку спяваці,

Ды і я ж між вамі ўзрос

Пры бацьку і маці.

\\
І мне Бог на свеце даў

Гора гараваці,

Штобы лепш я вас любіў

І ўмеў спагадаці.

\\
Ой, што ж вы напелі тут,

Ды якога дзіва!

Шкода, што на голас ваш

Старонка драмліва.

\\
Але як прачнецца з сну

Гэта Дабрадзейка,

Пэўна, будзе слухаць вас

Лепш, як салавейка.

\\
Будзем колісь так і мы,

Як тыя гуралі,

Што пан даў ім есць і піць,

Яшчэ й грошы бралі.

\\
Трэба толькі слухаць нам

Рады таго татка,

Што то казаў гараваць,

Каб аджыла хатка.

\\
Толькі, мусіць, той сынок

Не піў, як мы, водкі,

А то б яму вялеў ён:

Кінь і мёд салодкі.

\\
Ой, гаруйма, братцы, мы,

Кіньма горку жлопель,

Што не з жыта гоняць ўжо,

А з аўса, з картопель.

\\
Кіньце першы, жонкі, вы,

Мілыя дзяўчаты,

Доля, шчасце зачне жыць,

Дзе цвяроза хата.

\\
Благаславіць будзе Бог

Ў каморы, аборы,

І не будзе такі люд

Бяссільны, як хворы.

\\
Ой, каб колісь нам дажыць

Да такой паправы,

То запеў бы з вамі я,

Што нам Бог ласкавы!

 


===== Падобныя старонкі =====
  * [[творы/ян-чачот/ян-чачот-свіцязь]]
  * [[творы/ян-чачот/ян-чачот-о-ты-край-мой-нешчаслівы]]
  * [[творы/ян-чачот/ян-чачот-яжовыя-імяніны]]
  * [[творы/ян-чачот/ян-чачот-песні-і-балады]]
  * [[творы/ян-чачот/ян-чачот-паэзія-30-40-гг-хіх-ст]]