~~META:
title = Янка Сіпакоў — Тураўская элегія
&keywords = горад, плады, зямля, цішэюць
&abstract = Чытаць "Тураўскую элегію" Янкі Сіпакова
&iftrue = nan
~~

====== Янка Сіпакоў — Тураўская элегія ======
Сёння вясна красуецца, ажыўляючы зімовую прыроду.

Буйныя ветры, ціха павяваючы, песцяць і гадуюць плады.

I зямля, жывячы насенне, родзіць зялёную траву...

//З малення Кірылы Тураўскага//\\


Прыгінае і самых высокіх\\
Да зямлі вечны цяжар гадоў.\\
I цішэюць,

цішэюць крокі

I людзей і старых гарадоў.\\
\\
Як прысеў ты, драўляны горад!\\
З крэктам з замкавай споўз гары.\\
I стагоддзі з табой не гавораць,\\
Як калісьці маглі гаварыць.\\
\\
I за сценамі замка не радзяць,\\
Як прыняць з Егіпта гасцей.\\
А на колішнім княскім пасадзе\\
Бульба расце.\\
\\
Покуль сала княгіня смажыць\\
(Пах яго заваёўвае дзень),\\
З камунальных харомаў княжыч\\
Па каня з аброццю ідзе.\\
\\
Бы праз сон,

праз гады сваю веліч

Слухае горад стары,\\
Як над ім,

над стольным,

звінелі,

Нібы песня, званы ўгары.\\
\\
А таму,

калі сонца прагляне

I ўдзяўбнецца промнямі ў снег,\\
Як продкі, спавядаюцца тураўляне\\
Вясне.\\
\\
Хоць і вёснаў мінула багата,\\
Толькі ў Тураве,

як і тады,

Зямля атуляе і корміць зярняты,\\
Каб радзіць,

як даўней,

плады.\\
\\


Крыніца: Сіпакоў Я. Выбраныя творы. У 2 т. Т. 1. Паэзія / Прадм. Л. Ламекі. – Мн.: Маст. Літ., 1995. – 431 с.

 


===== Падобныя старонкі =====
  * [[творы/максім-танк/максім-танк-ой-не-гніце-ветры]]
  * [[слоўнік/элегія]]
  * [[творы/пімен-панчанка/пімен-панчанка-прысніўся-сон]]
  * [[творы/максім-багдановіч/не-кувай-ты-шэрая-зязюля]]
  * [[творы/аркадзь-куляшоў/аркадзь-куляшоў-элегія]]