~~META:
title = Янка Сіпакоў — Танец соснаў
&keywords = сосны
&abstract = Чытаць верш "Танец соснаў" Янкі Сіпакова
&iftrue = nan
~~

====== Янка Сіпакоў — Танец соснаў ======
Каб сустрэць хутчэй аўтобус,\\
Сосны выбеглі на ўзлесак\\
I, як людзі з караваем,\\
З аблачынкамі на лапках\\
Запрасілі ў сваю хату\\
На агледзіны іх казкі.\\
Гэта казка – танец соснаў:\\
Мітусяцца яны злева,\\
Справа – робяць круг шырокі\\
I, як бы дзяўчаткі тыя,\\
Так і млеюць, так і хочуць\\
За спіну другіх схавацца.\\
А калі карэнне раптам\\
Пад аўтобус наш трапляе, –\\
Сосны ўпрысядкі ірвуцца,\\
Як вясковыя танцоры,\\
А пасля ў ручай спяшаюць,\\
Каб абдаць вадою станы,\\
Разамлелыя у танцы.\\
Гляньце, гляньце, як галінкі\\
Засрабрыліся ад пырскаў!..\\
Толькі позна... Вунь з ускрайку\\
Нам апошняя сасонка\\
Памахала сваёй лапкай.\\
Едзе полем наш аўтобус,\\
Не ўзнімае ні пылінкі:\\
Мусіць, хоча азірнуцца,\\
Каб яшчэ хоць раз убачыць\\
Танец казачны сасонак.

 


===== Падобныя старонкі =====
  * [[ibdc.ped>сасна]]
  * [[ibdc.ped>сасна-пры-дарозе]]
  * [[творы/анатоль-бутэвіч/анатоль-бутэвіч-як-сасна-з-бярозай-пасяб]]
  * [[творы/іван-навуменка/іван-навуменка-сасна-пры-дарозе]]
  * [[творы/аркадзь-куляшоў/аркадзь-куляшоў-сасна-і-бяроза]]