~~META:
title = Янка Сіпакоў — Сонечны дождж
&keywords = кроплі
&abstract = Верш Янкі Сіпакова "Сонечны дождж"
&iftrue = nan
~~

====== Янка Сіпакоў — Сонечны дождж ======
Ён паліўся… Спорны, шчодры.\\
Церабнуў на промнях коса,\\
зазваніў са стрэх у вёдры,\\
на дварэ абмыў калёсы.\\
\\
Падстаўляюць чашкі кветкі –\\
хочуць піць пасля спякоты,\\
а ільнам, бы нам, няўседкі –\\
ліўнем мыюцца з ахвотай.\\
\\
Веццем-прыгаршчамі клёны\\
дажджавыя кроплі ловяць;\\
як жаніх, стаіць зялёны,\\
чыста вымыты ядловец.\\
\\
А пасля дажджовай працы\\
прыгажосць зямля прыдбала,\\
нават сонца прыбірацца\\
ў вясёлку спешна стала.

 


===== Падобныя старонкі =====
  * [[творы/янка-сіпакоў/янка-сіпакоў-клетка]]
  * [[творы/янка-сіпакоў/янка-сіпакоў-лета-з-мятлушкай]]
  * [[творы/янка-сіпакоў/янка-сіпакоў-заміра]]
  * [[творы/янка-сіпакоў/янка-сіпакоў-перавернуты]]
  * [[творы/янка-сіпакоў/янка-сіпакоў-як-спакайней]]