~~META:
title = Янка Сіпакоў — Санет кахання
&keywords = каханая
&abstract = Чытаць "Санет кахання" Янкі Сіпакова
&iftrue = nan
~~

====== Янка Сіпакоў — Санет кахання ======
Чаго саромецца, – ты у маім санеце,\\
Як у аазісе закінутым, адна,\\
Надзейна ахаваная штодня\\
Ад цынікаў, якіх нямала ў свеце.\\
\\
Ты мне здалёк, каханая, відна\\
На беразе нясходжанага лета.\\
Адзенне ўсё тваё – вяночак з кветак\\
На галаве, нібыта цішыня.\\
\\
О ява маіх вечных летуценняў,\\
Не трэба лепшага табе адзення!\\
\\
І я заўсёды буду берагчы\\
Тваю цнатлівасць светлую аддана.\\
Ты не саромейся мяне. Бо ты адна, лічы,\\
Ў маім санеце беражна схавана.

 


===== Падобныя старонкі =====
  * [[творы/максім-багдановіч/максім-багдановіч-санет-замёрзла-ноччу-ш]]
  * [[слоўнік/вянок-санетаў]]
  * [[слоўнік/санет]]
  * [[творы/максім-багдановіч/максім-багдановіч-санет-паміж-пяскоў-егі]]
  * [[творы/янка-купала/янка-купала-для-зямлі-прадзедаў-маіх]]