~~META:
title = Янка Сіпакоў — Жыццё
&keywords = свеце, рады
&abstract = Чытаць верш Янкі Сіпакова "Жыццё"
&iftrue = nan
~~

====== Янка Сіпакоў — Жыццё ======
Ціша над лугам такая,\\
Як птушка ў гняздзечку жыве.\\
Сонечны промень шукае\\
Штосьці ў зялёнай траве.\\
\\
Краскі, бы гронкі салюта,\\
Святочна ўзлятаюць з зямлі.\\
Пахне і мята, і рута,\\
Гудуць клапатліва чмялі.\\
\\
Вецер ласкавым павевам\\
Перабірае лісты.\\
Чутна, як дыхаюць дрэвы\\
I размаўляюць кусты.\\
\\
Птушкі смяюцца і дзеці –\\
А смех іх шчаслівы такі!\\
Над імі – чысцейшы на свеце\\
Незамутнёны блакіт.\\
\\
На лузе, нібыта на свяце,\\
Стаю ў неспатольнай любві...\\
Як боязна ўсё гэта страціць,\\
Як страшна ўсё гэта згубіць.\\
\\
I быццам дзіця, гэтаксама\\
Ў здзіўленні гляджу на траву:\\
– Як рады, як рады я, мама,\\
Што проста на свеце жыву!

 


===== Падобныя старонкі =====
  * [[творы/янка-сіпакоў/янка-сіпакоў-лета-з-мятлушкай]]
  * [[творы/янка-сіпакоў/янка-сіпакоў-як-спакайней]]
  * [[творы/янка-сіпакоў/янка-сіпакоў-клетка]]
  * [[творы/янка-сіпакоў/янка-сіпакоў-перавернуты]]
  * [[творы/янка-сіпакоў/янка-сіпакоў-заміра]]