~~META:
title = Янка Сіпакоў — Вада
&keywords = вада, відаць, глытку, пах, смак
&abstract = Верш Янкі Сіпакова "Вада"
&iftrue = nan
~~

====== Янка Сіпакоў — Вада ======
//Вада – бясколерная, празрыстая вадкасць//

//без паху і смаку.\\
//

//З даведнікаў//

\\
Хто сказаў – вада без паху?\\
Хто сказаў – вада без смаку?\\
Той, відаць, не смяг у спёку\\
І ад смагі ў суш не млеў.\\
\\
Той, відаць, вадой не трызніў,\\
Не хапаў яе у жмені –\\
Калі боязна рассыпаць\\
Нават кропельку ў траву.\\
\\
Той не мроіў ёй – да тлуму,\\
І не прагнуў – да трымцення,\\
Калі п’еш, і ўсё, здаецца,\\
Не спатолішся ніяк.\\
\\
Той, відаць, не поўз пустыняй,\\
Не ўсыхаў у акіяне,\\
Калі пахі ўсе і смакі –\\
У глытку пітной вады.\\
\\
У глытку, што як дажджынка,\\
У глытку, што як расіна,\\
На лістку, бы на далоні,\\
Гэтак зманліва дрыжыць.\\
\\
І ўжо ў гэтай нават кроплі –\\
Усе колеры вясёлкі.\\
Хто ж яе знаў бескалёрнай?\\
Божа мой, які дзівак?!\\
\\
Хто ваду наспех пакрыўдзіў,\\
Хто ваду спрытна абразіў?\\
Хто сказаць мог так будзённа\\
Пра таемнасць – пра ваду?..\\
\\
Веру я: і ён, сасмаглы,\\
Толькі ўбачыўшы расіну,\\
Закрычыць, бы звар’яцелы,\\
З дзікай радасці:\\
– Ва-да-а!

 


===== Падобныя старонкі =====
  * [[творы/янка-сіпакоў/янка-сіпакоў-перавернуты]]
  * [[творы/янка-сіпакоў/янка-сіпакоў-заміра]]
  * [[творы/янка-сіпакоў/янка-сіпакоў-клетка]]
  * [[творы/янка-сіпакоў/янка-сіпакоў-лета-з-мятлушкай]]
  * [[творы/янка-сіпакоў/янка-сіпакоў-як-спакайней]]