~~META:
title = Янка Лучына — Роднай старонцы
&keywords = Лучына, родная, старонка
&abstract = Чытаць верш Янкі Лучыны "Роднай старонцы"
&iftrue = nan
~~

====== Янка Лучына — Роднай старонцы ======
Ты параскінулась лесам, балотамі,\\
Выдмай пясчанай, неураджайнаю,\\
Маці-зямліца, і умалотамі\\
Хлеба нам мерку не даш звычайную.\\
А сын твой, беднаю адзет сярмягаю,\\
З лыка пляцёныя лапці абуўшы,\\
Едзе драбінамі ці калымагаю,\\
Конем, што цягне, як бы заснуўшы...\\
Усё ў табе бедна. Часта заплача\\
Мужык-араты дзеля злой долі,\\
Цяжка працуючы. Ён жа, аднача,\\
З табой расстацца не жджэ ніколі.\\
I непрыглядную хату з пажыткамі,\\
I поле скупое, выган без пашы\\
Мы, апрануўшыся старымі світкамі,\\
Любім і цэнім − бо яны нашы.\\
Дасць Бог, крывавым потам аратаму\\
Здабрыць пясчану зямліцу здарыцца,\\
Быць добра сытаму, хоць не багатаму,\\
А дзеля празніка і чарка нам зварыцца.\\
Сонца навукі скрозь хмары цёмныя\\
Прагляне ясна над нашай ніваю,\\
I будуць жыці дзеткі патомныя\\
Добраю доляй − доляй шчасліваю!..

 


===== Падобныя старонкі =====
  * [[творы/янка-лучына/янка-лучына-вясна]]
  * [[творы/янка-лучына/творчасць-янкі-лучыны]]
  * [[творы/янка-лучына/янка-лучына-дзень-за-днём]]
  * [[творы/янка-лучына/янка-лучына-стары-ляснік]]
  * [[творы/янка-лучына/янка-лучына-што-думае-янка-везучы-дровы-]]