~~META:
title = Янка Лучына — Вясна
&keywords = Лучына, вясна
&abstract = Чытаць верш Янкі Лучыны "Вясна"
&iftrue = nan
~~

====== Янка Лучына — Вясна ======
Кажуць людзі: "Вясна!"− піша так каляндар.\\
Хто ж пазнае яе, калі сыпле ўсё снег?\\
Дарма ладзіў саху на той час гаспадар,\\
Ды і бусел да нас прыляцеў як на смех.\\
Жураўлі ўжо лятуць з крыкам звонкім − ключом,\\
Кінуў вырай кулік, чайка недзе скігліць,\\
А ўсё сівер як дуў, дзьме па полю па том,\\
Гул па лесе ідзе: "Яшчэ летку − не быць!"\\
Ой, ты доля мая! − так, як гэта вясна.\\
Да мяне ты не йдзеш,− хоць даўно бы пара!\\
З горкай чаркі як піў, так і п’ю я да дна,\\
I не свеціць яшчэ у пацёмках зара.\\
Адзавіся! − дзе ты? − за табой я пайду\\
На край света шукаць! − на якой ты мяжы?..\\
Адзавісь, зашчабеч салавейкам ў саду!\\
Яснай зоркай ўзгляні! − Дзе ты, доля,− скажы!

 


===== Падобныя старонкі =====
  * [[творы/янка-лучына/творчасць-янкі-лучыны]]
  * [[творы/янка-лучына/янка-лучына-што-думае-янка-везучы-дровы-]]
  * [[творы/янка-лучына/янка-лучына-роднай-старонцы]]
  * [[творы/янка-лучына/янка-лучына-стары-ляснік]]
  * [[творы/янка-лучына/янка-лучына-дзень-за-днём]]