~~META:
title = Янка Купала — Явар і каліна
&keywords = чары, явар, зімнія, калінаю, скінуўшы
&abstract = Чытаць верш Янкі Купалы "Явар і каліна"
&iftrue = nan
~~

====== Янка Купала — Явар і каліна ======
Песняй вясны лебядзінаю,

Скінуўшы зімнія чары,

Шэпчуцца явар з калінаю

Ў сумнай даліне над ярам.

\\
Лісцікі зеленяй хваляцца

Небу панятлівай мовай:

Росамі мыюцца раніцай,

Песцяцца сонцам паўднёвым.

\\
Захадам модлы пакорныя

З маткай-зямлёй адпраўляюць;

Тайна у ночаньку чорную

Месяца, зор выглядаюць.

\\
Слухаюць смехаў русалчыных,

Лопату крылляў начніцы,

Ветру павеваў ап’янчаных,

Плюскату шклістай крыніцы.

\\
Чуецца музыка дзіўная

Ў повесцях сонных імшараў...

Цешыцца явар з калінаю,

Скінуўшы зімнія чары.

\\
1910

 


===== Падобныя старонкі =====
  * [[творы/янка-купала/янка-купала-пясняр-беларускага-народа]]
  * [[ibdc.ped>явар-майго-дзяцінства]]
  * [[творы/янка-купала/тэма-народнага-жыцця-і-любоў-да-радзімы-]]
  * [[ibdc.ped>явар]]
  * [[творы/янка-купала/тэма-паэта-і-паэзіі-ў-творчасці-янкі-куп]]