~~META:
title = Янка Купала — Сірочая доля
&keywords = хіба, брамы, кожны, цярпіш
&abstract = Чытаць верш Янкі Купалы "Сірочая доля"
&iftrue = nan
~~

====== Янка Купала — Сірочая доля ======
Цяжка сірацінцы

Адзінокай жыць;

Доля-весялуха

Знікуль не бяжыць.

\\
За хатай і ў хаце

Цярпіць сірата:

То мароз марозе,

То золіць слата.

\\
Бачаць маці, бацька

Роднае дзіцё;

Ўбогую сіротку

Хто ж убача, хто?

\\
Ад брамы да брамы

Йдзе, збірае хлеб,

Ручачку працягне, –

Кожны глух і слеп.

\\
Кожны насмяецца

Над беднаю ей,

Са зрэбнай кашулі,

З лазовых лапцей.

\\
Ой, цярпіш, сіротка,

Ўсё жыццё цярпіш;

Пойдзеш у магілку, –

Хто ж паставе крыж?

\\
Хто, як ляжаш спаці

Навекі ў зямлю,

Пацеры згавора

За душу тваю?

\\
Хіба гэты вецер,

Што ў платах пяе,

Хіба з дажджом хмарка

Слязу праліе.

\\
Хіба ночкай зоркі,

Што ў небе гараць,

Па сіротцы ўбогай

Будуць бедаваць.

\\
1906-1910

 


===== Падобныя старонкі =====
  * [[ibdc.ped>сіроты]]
  * [[творы/янка-купала/янка-купала-пясняр-беларускага-народа]]
  * [[творы/цётка-алаіза-пашкевіч/цётка-сірата]]
  * [[творы/цётка-алаіза-пашкевіч/цётка-сірацінка]]
  * [[творы/якуб-колас/якуб-колас-сірата-юрка]]