~~META:
title = Янка Купала — Снег
&keywords = снег, смех, спавіў, сваяк, пасцель
&abstract = Чытаць верш Янкі Купалы "Снег"
&iftrue = nan
~~

====== Янка Купала — Снег ======
Залягла, як пасцель,\\
Лебядзіная бель\\
На загон, на курган.\\
I кажан, і груган\\
Занямеў не на смех:\\
Гэта снег, толькі снег...\\
\\
За старухай-зямлёй\\
Ты пасцель, дружа мой,\\
Узваліў на душу,\\
Як бы крыж на мяжу,\\
I ужо рад не на смех:

Гэта снег, толькі снег...

\\
Думкі, сэрца, паглёд\\
Абліў лёд, скаваў лёд.\\
Так спавіў, спавіў сам,\\
Каб лягчэй было там,\\
Дзе жыццё не на смех:

Гэта снег, толькі снег...

\\
Ты і жыў, і любіў,\\
Ты не ўмёр – і забыў,\\
Каб нічога не дбаць,\\
Смела ўдаль паглядаць,\\
Быць самым не на смех...

Гэта снег, толькі снег...

\\
Хтось – сваяк, не сваяк –\\
Як жыў, скончыўся так.\\
Прагудзеў поп і звон,\\
Ідзі з памяці вон:\\
Бой за хлеб не на смех!

Гэта снег, толькі снег...

\\
Мо і лёгкія дні...\\
Не зачэпяць ані\\
Ні бяда, ні нуда,\\
Ні агонь, ні вада...\\
Само шчасце, сам смех!

Гэта снег, толькі снег...

\\
1909\\
\\


Крыніца: Купала Я. Поўны збор твораў. У 9 т. Т. 2. Вершы, пераклады 1908-1910. – Мн., Маст. літ., 1996. – 342 с.

 


===== Падобныя старонкі =====
  * [[творы/юрась-свірка/юрась-свірка-з-першым-снегам]]
  * [[творы/якуб-колас/якуб-колас-першы-снег]]
  * [[ibdc.ped>першы-снег-3700]]
  * [[ibdc.ped>першы-снег]]
  * [[творы/казімір-камейша/казімір-камейша-першы-снег]]