~~META:
title = Янка Купала — Паўстань...
&keywords = паўстань, народу, жджэ, беларусь, ўладар, народ, прарок, ваяк, пясняр, край
&abstract = Чытаць верш Янкі Купалы "Паўстань..."
&iftrue = nan
~~

====== Янка Купала — Паўстань... ======
Паўстань з народу нашага, прарок,\\
Праяваў бураломных варажбіт,\\
I мудрым словам скінь з народу ўрок,\\
Якім быў век праз ворагам спавіт!\\
\\
Збяры ў адну ўсю Беларусь сям’ю,\\
Вазьмі з яе прысягу і зарок,\\
Што не прадасць сябе, сваю зямлю...\\
Зняць путы Бацькаўшчыне ўстань, прарок!\\


****** ***

Паўстань з народу нашага, пясняр,\\
Былых і будучых вякоў баян,\\
I ў бурны кліч, як буры ўдар,\\
3 віхрамі загудзі над звон кайдан!\\
\\
Гудзі над Беларусяй з краю ў край,\\
У сэрцах спячых распалі пажар,\\
Над курганамі перуном зайграй!\\
Збудзіць нябожчыкаў паўстань, пясняр!\\


****** ***

Паўстань з народу нашага, ваяк,\\
I волатам на вогненным кані\\
Народ аграблены – бы з торб жабрак –\\
За Бацькаўшчыну павядзі ў агні!\\
\\
Да хвалы шлях айчыне пакажы,\\
Змяці з палёў яе чужых бадзяк,\\
На стражы стань гранічнае мяжы...\\
Свой край заваяваць паўстань, ваяк!\\


****** ***

Паўстань з народу нашага, Ўладар,\\
Адбудаваць свой збураны пасад,\\
Бо твой народ забыў, хто гаспадар\\
I хто яго абдзёр з каронных шат.\\
\\
На Ўладара жджэ Беларусь даўно,\\
I жджэ цябе ўладарства Божы дар,\\
Вялікае, магутнае яно...\\
Пад беларускі сцяг прыйдзі, Ўладар!\\
\\
1919\\
\\


Крыніца: Купала Я. Поўны збор твораў. У 9 т. Т. 4. Вершы, пераклады 1915-1929. – Мн.: Маст, літ., 1997. – 446 с.

 


===== Падобныя старонкі =====
  * [[творы/юрась-свірка/юрась-свірка-верны-крэўнаму-брацтву]]
  * [[ibdc.ped>душа-народа]]
  * [[творы/якуб-колас/якуб-колас-народ-у-трылогіі-на-ростанях-]]
  * [[творы/васіль-зуёнак/васіль-зуёнак-будучыня]]
  * [[творы/якуб-колас/служэнне-народу-асноўны-абавязак-мастака]]