~~META:
title = Янка Купала — Паязджане
&keywords = Купала, паязджане
&abstract = Чытаць верш "Паязджане" Янкі Купалы
&iftrue = nan
~~

====== Янка Купала — Паязджане ======
Распаўзлася па абшары\\
Сцюжным пухам, сцюжнай марай\\
Папаўзуха-завіруха —\\
Злога духа злыбядуха.\\
\\
Ў полі дымна, ў полі цёмна,\\
Беспатольна і заломна,\\
Ні пуціны, ні упыння,\\
Як у вечнай дамавіне.\\
\\
Як у моры, ў белым снегу,\\
Без днявання, без начлегу,\\
Ў бездарожжа, ў беспрыстанне\\
Едуць, едуць паязджане.\\
\\
Едуць, едуць, ані следу,\\
Ні праслуху, ні прагледу,\\
Ні прасвету, ні надзеі, —\\
Ўсё ў зацьмішчы, ўсё ў завеі.\\
\\
Папаўзуха-завіруха\\
Шэпча, шэпча штось да вуха\\
Аб музыцы-дудаграі,\\
Аб пшанічным караваі.\\
\\
Снежным надзячы начлегам,\\
Пасыпае сном і снегам,\\
Лазам лезе ў сэрца, ў вочы,\\
Зазірае патарочай.\\
\\
Маладога к маладусе,\\
Свата к свацці-пасядусе,\\
Да закосніцы закосню\\
Жах прытульна прыкаросніў.\\
\\
Прытуліліся, як дзеці,\\
Як галубкі на рассвеце,\\
Як нішто ні знаць, ні ведаць,\\
І ўсё едуць, едуць, едуць.\\
\\
А над імі збеядуха,\\
Папаўзуха-завіруха,\\
Снежнай хустаючы вехай,\\
Захліпаецца ад смеху.\\
\\
1918

 


===== Падобныя старонкі =====
  * [[творы/янка-купала/драматургічнае-майстэрства-янкі-купалы]]
  * [[творы/янка-купала/тэма-народнага-жыцця-і-любоў-да-радзімы-]]
  * [[творы/янка-купала/янка-купала-пясняр-беларускага-народа]]
  * [[творы/янка-купала/пошукі-героямі-шляхоў-да-шчаслівага-жыцц]]
  * [[творы/янка-купала/тэма-паэта-і-паэзіі-ў-творчасці-янкі-куп]]