~~META:
title = Янка Купала — Зімовая ноч
&keywords = даедзе
&abstract = Верш Янкі Купалы "Зімовая ноч"
&iftrue = nan
~~

====== Янка Купала — Зімовая ноч ======
Каля зоркі зорка\\
Уніз глядзіць, мігціць;\\
Каля горкі горка\\
Снегам зіхаціць.\\
\\
На гасцінцы скрогат,\\
На прысадах інь,\\
Чутна воўчы рогат...\\
Глуш, дзе вокам кінь.\\
\\
Цягнецца каняжка,\\
Сані – за канём;\\
Янка пад сярмяжкай\\
На санях клубком.\\
\\
Сіверна, марозна,\\
Забірае дрож,\\
Пырхае трывожна,\\
Толькі жыў гнядош.\\
\\
Неба залаціцца,\\
Пад санямі шум;\\
Многа Янцы сніцца\\
Ў гэту ночку дум...\\
\\
Аб спакойнай вёсцы,\\
Аб кутку сваім,\\
Аб вясне, аб сонцы,\\
Аб жыцці другім.\\
\\
Міла ў думках брэдзе,\\
Цешыцца праз сон,\\
Але ці даедзе?\\
Ці даедзе ён?..\\
\\
1909

 


===== Падобныя старонкі =====
  * [[ibdc.ped>веснавая-ноч]]
  * [[творы/янка-купала/янка-купала-пясняр-беларускага-народа]]
  * [[творы/максім-багдановіч/максім-багдановіч-ноч]]
  * [[ibdc.ped>начное-жыццё]]
  * [[творы/рыгор-ігнаценка/рыгор-ігнаценка-сон-у-лесе]]