~~META:
title = Янка Купала — Жняя
&keywords = царыца, йдзе, сонца
&abstract = Верш Янкі Купалы "Жняя"
&iftrue = nan
~~

====== Янка Купала — Жняя ======
Як сама царыца\\
Ў залатой кароне,\\
Йдзе яна ў вяночку\\
Паміж спелых гоняў.\\
\\
З каласкоў вяночак –\\
Моладасці сведка –\\
На ёй зіхаціцца,\\
Як у садзе кветка.\\
\\
На грудзях шчаслівых\\
Каптанок ружовы,\\
У руцэ сярпочак\\
Зублены, сталёвы.\\
\\
Вецер абнімае\\
Стан яе дзявочы,\\
Сонца ёй цалуе\\
Шыю, твар і вочы.\\
\\
Каласкі хінуцца\\
Перад ёй паклонна,\\
Дзівіцца ігруша\\
На мяжы зялёнай.\\
\\
А яна – царыца –\\
Весела, шчасліва\\
Карануе песняй\\
Залатое жніва.\\
\\
Смела йдзе у сонцы\\
Ўся сама – як сонца,\\
Гэта жнейка наша\\
У нашаей старонцы.\\
\\
1911

 


===== Падобныя старонкі =====
  * [[творы/янка-купала/тэма-народнага-жыцця-і-любоў-да-радзімы-]]
  * [[творы/янка-купала/тэма-паэта-і-паэзіі-ў-творчасці-янкі-куп]]
  * [[творы/янка-купала/драматургічнае-майстэрства-янкі-купалы]]
  * [[творы/янка-купала/янка-купала-пясняр-беларускага-народа]]
  * [[творы/янка-купала/пошукі-героямі-шляхоў-да-шчаслівага-жыцц]]