Быў гэта толькі сумны сон
Душы расплаканай маей,
Што сярод бледных будных дзён
Я свята меў, глядзеў святлей.

Быў гэта толькі сумны сон,
Што у вачох яе скрозь смех
Чытаў святы сабе закон
Кахання шчырага і ўцех.

Быў гэта толькі сумны сон,
Што вось інакшая яна
I пойме болю майго стогн,
Зірне ў душу маю да дна.

Быў гэта толькі сумны сон,
Што развяду я з ёй бяду,
Што пад яе напеваў звон
Лягчэй к магіле дабрыду.

Ўсё для мяне быў гэта сон;
Хтось іншы яву меў ў жыцці, –
Ён ёй і мне стварыў прыгон,
А сам сышоў, каб… не прыйсці!

1915

• янка-купала/янка-купала-пясняр-беларускага-народа
• янка-купала/тэма-народнага-жыцця-і-любоў-да-радзімы-
• янка-купала/янка-купала-сон-на-кургане
• янка-купала/драматургічнае-майстэрства-янкі-купалы
• янка-купала/тэма-паэта-і-паэзіі-ў-творчасці-янкі-куп