~~META:
title = Янка Купала — Быў гэта сон...
&keywords = гэта, толькі, сумны
&abstract = Чытаць верш Янкі Купалы "Быў гэта сон..."
&iftrue = nan
~~

====== Янка Купала — Быў гэта сон... ======
Быў гэта толькі сумны сон\\
Душы расплаканай маей,\\
Што сярод бледных будных дзён\\
Я свята меў, глядзеў святлей.\\
\\
Быў гэта толькі сумны сон,\\
Што у вачох яе скрозь смех\\
Чытаў святы сабе закон\\
Кахання шчырага і ўцех.\\
\\
Быў гэта толькі сумны сон,\\
Што вось інакшая яна\\
I пойме болю майго стогн,\\
Зірне ў душу маю да дна.\\
\\
Быў гэта толькі сумны сон,\\
Што развяду я з ёй бяду,\\
Што пад яе напеваў звон\\
Лягчэй к магіле дабрыду.\\
\\
Ўсё для мяне быў гэта сон;\\
Хтось іншы яву меў ў жыцці, –\\
Ён ёй і мне стварыў прыгон,\\
А сам сышоў, каб... не прыйсці!\\
\\
1915

 


===== Падобныя старонкі =====
  * [[творы/янка-купала/янка-купала-пясняр-беларускага-народа]]
  * [[творы/янка-купала/тэма-народнага-жыцця-і-любоў-да-радзімы-]]
  * [[творы/янка-купала/янка-купала-сон-на-кургане]]
  * [[творы/янка-купала/драматургічнае-майстэрства-янкі-купалы]]
  * [[творы/янка-купала/тэма-паэта-і-паэзіі-ў-творчасці-янкі-куп]]