~~META:
title = Янка Золак — Ода маці
&keywords = маці, жыццё, дзяцей, прынёс, жыцця, свет, хвала
&abstract = Чытаць верш Янкі Золака "Ода маці"
&iftrue = nan
~~

====== Янка Золак — Ода маці ======
//Маме Ганне//

Хвала табе, жанчына-Маці,\\
Хвала і мой зямны паклон!\\
Бо ты, каб даць жыццё дзіцяці,\\
Сваё жыццё кладзеш на кон.\\
\\
Дзяцей ты песціш і гадуеш,\\
Каб іх людзьмі пусціць у свет,\\
Хоць мо’ не кожны з іх шануе\\
Цябе – жыцця зямнога цвет.\\
\\
Быць можа, хтосьці з іх няўдзячны\\
Прынёс у косы твае снег;\\
Ад іх ты, часам, і паплачаш,\\
Але дзяцей не праклянеш.\\
\\
Ты – жыццядайная крыніца,\\
Што жывіць нас із роду ў род.\\
Табою смела ганарыцца\\
I сем’янін твой і народ.\\
\\
Не грэх тут будзе прыгадаці:\\
Табе пашану й Бог прынёс,\\
Бо праз цябе, людзкая Маці,\\
На свет прыйшоў Ісус Хрыстос.\\
\\
Хвала-ж табе, руплівай Маці!\\
Я прад табой хілю чало.\\
Каб не магла жыцця ты даці, –\\
На свеце й нас-бы не было.\\
\\
10 траўня 1969 г.\\


 


===== Падобныя старонкі =====
  * [[слоўнік/ода]]
  * [[ibdc.ped>i-надыходзіць-дзень]]
  * [[ibdc.ped>на-скрыжаванні]]
  * [[ibdc.ped>сустрэча-з-маці]]
  * [[ibdc.ped>да-маці]]