~~META:
title = Янка Золак — Ворагам беларушчыны
&keywords = жыць, хочаце, волі, шлях, крыві, няўжо, нашто
&abstract = Чытаць верш Янкі Золака "Ворагам беларушчыны"
&iftrue = nan
~~

====== Янка Золак — Ворагам беларушчыны ======
Чаго вам хочацца, сатрапы?\\
Нашто вам трэба наша кроў?\\
Нашто рвяцё агіднай лапай\\
З кагорты нашай змагароў?\\
\\
За што вы помсціце, скажыце?!\\
Хіба за тое, што яны\\
Вучылі нас, як жыць на свеце\\
Без крыўды, здзекаў і маны?\\
\\
Няўжо вы хочаце наганам\\
Спыніць за Бацькаўшчыну рух,\\
Сваёю сілаю паганай\\
Здушыць крывіцкі вольны дух?\\
\\
Няўжо вы хочаце прымусіць\\
Крывіцкіх доблесных сыноў\\
Зрачыся Маці-Беларусі\\
I пад прыгон пайсці ізноў?\\
\\
Не ўдасца вам, забойцаў зграя,\\
На Беларусь надзець хамут!\\
Вам не гуляць у нашым краі,\\
Не цешыць сэрца звонам пут!\\
\\
Дарэмны вашы намаганні:\\
Жыў беларус і будзе жыць!\\
Ён сам здалее у змаганні\\
Свой шлях да волі пралажыць!\\
\\
Вы не спужаеце нас болей\\
Пагрозай смерці з-за вугла;\\
I, шлях цярэбячы да волі,\\
Мы знішчым вас усіх датла.\\
\\
Надыйдзе грозны час расплаты\\
За кроплі нашае крыві, –\\
Не хопіць вам, забойцы-каты,\\
Ўсёй вашай чорнае крыві.\\
\\
14 снежня 1943 г.

 


===== Падобныя старонкі =====
  * [[творы/янка-золак/янка-золак-прыйсце]]
  * [[творы/янка-золак/янка-золак-газэла]]
  * [[постаці/янка-золак]]
  * [[творы/янка-золак/янка-золак-мой-дух]]
  * [[творы/янка-золак/янка-золак-божа-ўсяўладны]]