~~META:
title = Янка Журба — Як люблю я цябе, Беларусь!..
&keywords = люблю, прастор, беларусь, прыгажосць
&abstract = Чытаць верш Янкі Журбы "Як люблю я цябе, Беларусь!.."
&iftrue = nan
~~

====== Янка Журба — Як люблю я цябе, Беларусь!.. ======
Як люблю я цябе,\\
Беларусь ты мая,\\
І як дорага ўся\\
Прыгажосць мне твая!

\\
Вось я полем іду\\
Цёплай летняй парой.\\
Я любуюся тут\\
Нашай роднай красой.

\\
Ясната ў небе скрозь,\\
Няма воблачка ў ім.\\
Моцна вабіць мяне\\
Даль прасторам сваім.

\\
Палымнее усход –\\
Нібы ўспыхнуў пажар.\\
Сонцу гімны звіняць;\\
Колькі ў гімнах тых чар!

\\
Вось я ў пушчу прыйшоў;\\
Эх, які ж тут прастор!\\
Як далёка кругом\\
Лес шацёр распасцёр!

\\
Тут бярозы стаяць\\
Беласнежнай сям’ёй;\\
Упрыгожаны дол\\
Аксамітам-травой.

\\
А за лесам ізноў –\\
Сенажаці, палі.\\
Тут чакаюць зярна\\
Скібы свежай раллі.

\\
Хутка вечар прыйшоў\\
З цішынёю сваёй –\\
І заснуў ціхім сном\\
Лес вячэрняй парой.

\\
У абдымках смугі\\
Задрамалі кусты;\\
На зялёным галлі\\
Ўжо не шэпчуць лісты.

\\
Вунь дыміцца рака,\\
Сціхлі скрозь галасы,\\
Замігцелі ў траве\\
Дыяменты расы.

\\
Ўсю тваю прыгажосць,\\
Беларусь ты мая,\\
І тваю яснату,\\
Эх, люблю ж моцна я!

\\
Як жа радасна мне\\
Твой прастор аглядаць,\\
Шчырым сэрцам цябе\\
З жыццём новым вітаць.

\\
\\
Крыніца: Журба Я. Вершы. – Мн.: Народная асвета, 1970. – 144 с.

 


===== Падобныя старонкі =====
  * [[творы/янка-журба/янка-журба-братняй-украіне]]
  * [[творы/янка-журба/янка-журба-вясна-ідзе]]
  * [[творы/янка-журба/янка-журба-залацісты-вечар-дагарае]]
  * [[творы/янка-журба/янка-журба-коцік]]
  * [[творы/янка-журба/жыццёвы-і-творчы-шлях-янкі-журбы]]