~~META:
title = Янка Брыль — Чым накармілі Мішутку
&keywords = тата, маша, мама, грыбы, пахлёбку, акно, мядзведзя, пайшла, пуця, назбірала, Люда
&abstract = Чытаць мініяцюру Янкі Брыля "Чым накармілі Мішутку"
&iftrue = nan
~~

====== Янка Брыль — Чым накармілі Мішутку ======
Люда наогул любіць і ўмее прыдумваць.\\
Яшчэ калі яна была зусім маленькая, трохі больш за паўтара года, і тата, стоячы на верандзе, трымаў яе на руках, Людачка заўважыла, як пад застрэшкам у павуціне б’ецца і ные муха.\\
– Пуця! – сказала яна, працягнуўшы заслінены пальчык. – Пуця у-та-та!..\\
А «пуці» было не да гушкалкі.\\
Потым неяк, гадоў яшчэ праз паўтара, глянула малая раненька ў акно і ўсцешылася:\\
– Ой, мама, а сняжок як за ноч падрос! Большы яшчэ, як учора!..\\
Цяпер ужо Людачцы пяты год.\\
Сёння нядзеля, і тата не пайшоў на работу. Люда прачнулася, бачыць – Аня-Пампушка яшчэ спіць, мама ўжо кудысьці пайшла, а тата сядзіць ды чытае.\\
І Люда задумалася, падпёршы кулачком пасля сну не вельмі румяную шчаку.\\
– Ну, што? – спытаўся, пачакаўшы, тата. – Што, мая цёця-маркоця?\\
– Тата, а Маша ж з’ела ўсю пахлёбку!..\\
– Якая Маша? Якую пахлёбку?\\
– А там, што мама ўчора нам чытала: пра Машу і пра трох мядзведзяў.\\
– Ну і што?\\
– Маша з’ела ўсю пахлёбку, а чым жа мядзведзіха накарміла тады малога Мішутку?\\
– Т-ак... Тут, брат, і сапраўды задача...\\
– А я, тата, думала, думала і прыдумала!\\
– Ну?\\
– Вось паслухай. Маша пайшла тады ў лес па грыбы?\\
– Ну, скажам, па грыбы.\\
– І назбірала грыбоў?\\
– Трэба думаць, што назбірала.\\
– А потым яна спалохалася мядзведзяў і ўцякла праз акно... А грыбы ж свае яна забылася!.. Ага! І Мішуткава мама падсмажыла іх маленькаму... Праўда?

 


===== Падобныя старонкі =====
  * [[творы/янка-брыль/увесь-свет-адзін-дом-па-раману-янкі-брыл]]
  * [[творы/янка-брыль/раман-янкі-брыля-птушкі-і-гнёзды-вобраз-]]
  * [[творы/янка-брыль/птушкі-i-гнёзды-сцюдзёны-вырай-аповесць-]]
  * [[творы/янка-брыль/птушкі-i-гнёзды-гнёзды-за-дымам-аповесць]]
  * [[творы/янка-брыль/янка-брыль-сірочы-хлеб]]