~~META:
title = Якуб Колас — Юрка і кот
&keywords = сыр, юрка, мама, каток, сала, кут, коцік, есць, матка
&abstract = Верш Якуба Коласа "Юрка і кот"
&iftrue = nan
~~

====== Якуб Колас — Юрка і кот ======
Юрка рана прабудзіўся.\\
– Есці дайце мне! – крычыць:\\
Я ляжаў і зверадзіўся,\\
Нездароў я – ўсё баліць.\\
Матка хлеба адламала.\\
– На, сынок, крыху пажуй.\\
– Колькі ты дала мне? мала!\\
– Еш, сыночак, не сярдуй,\\
Сердаваць няможна: брыдка,\\
Ты ж вялікі ўжо хлапец:\\
Паглядзі, якая лытка,\\
Расцягнуўся, як касец.\\
– Ты мне сыру дай ці сала!\\
– Бач, які ты ласунок!\\
Сала, ведаеш, патала,\\
Сыр увесь паеў каток.\\
Юрка тут узбунтаваўся.\\
Б’е нагамі у сяннік,\\
На ўсю хату раскрычаўся,\\
Маме высунуў язык.\\
– Ах, распуснік! ці ж то можна\\
Гэтак маму зневажаць?\\
Матка злёгка, асцярожна\\
Стала Юрку прабіраць.\\
– Гэта, мама, я жартую.\\
Больш не буду, мама, не!\\
І табе я ўсё дарую,\\
А ты сыру ўсё ж дай мне!\\
Як тут з ім не пагадзіцца?\\
Ну, як хлопцу адказаць?\\
– Што ж? даволі нам сварыцца:\\
Трэба сыру Юрку даць.\\
Юрка есць і разважае,\\
Да яго прыбег каток\\
І на Юрку паглядае:\\
Дай і мне, моў, хоць драбок!\\
Але Юрка не ахвочы\\
Катка сырам частаваць.\\
– Ты чаго уставіў вочы?\\
Вон пайшоў мышэй ганяць!\\
Хітры коцік ўсё ж падкраўся\\
Ды з-за коўдры ўсё глядзіць,\\
І чуць Юрка зазяваўся –\\
Цоп за сыр! і ў кут бяжыць.\\
Юрка плача і сярдуе,\\
Хоча біць насмерць ката.\\
Коцік есць і ў вус не дуе,\\
Не вылазячы з кута.\\
Потым спінку выгінае,\\
Хвосцік трубкаю задраў –\\
І казанне пачынае,\\
Як ён Юрку ашукаў.\\
\\
[1921]\\
\\
\\
Крыніца: Колас, Я. Збор твораў: у 20 т. Т. 2 : Вершы 1911-1938

 


===== Падобныя старонкі =====
  * [[ibdc.ped>сучасная-казка-пра-бясстрашнае-кацяня]]
  * [[творы/максім-танк/максім-танк-бабка-і-кот]]
  * [[творы/артур-вольскі/артур-вольскі-коцік]]
  * [[творы/віктар-гардзей/віктар-гардзей-коцік]]
  * [[творы/янка-журба/янка-журба-коцік]]